Este sábado 28 de xuño, Vilagarcía de Arousa convértese no epicentro do baloncesto base galego coa celebración da Xuntanza Preminibasket da xeración 2016, unha cita que reune, como xa é tradición ao remate de cada temporada, ás seleccións das sete delegacións FEGABA e a dous combinados das Seleccións Galegas 2016.
Ao longo da xornada disputaranse en FEXDEGA 16 encontros en catro pistas simultáneas, ofrecendo un espectáculo deportivo continuo desde as 10:30 h da mañá ata as 17:00 H da tarde, nun ambiente festivo e de convivencia.
Os partidos arrincarán ás 10:30 h coa dobre estrea dos combinados de Arousa contra Santiago (categorías masculina e feminina), Coruña contra Vigo, e continuarán ao mediodía cos duelos de Ourense ante Galicia 2016 e Lugo contra Ferrol. Tras unha pausa para o xantar, a actividade retomarase ás 15:30 h co cruce entre Arousa e Coruña, Vigo e Santiago, e rematará coas eliminatorias finais que enfrontarán a Lugo con Ourense, e a Ferrol co combinado Galego 2016.
A Xuntanza non só será unha oportunidade para ver en acción aos deportistas máis novos, senón tamén un espazo de valores e aprendizaxe.
Esta cita representa un punto clave no traballo de avaliación e seguimento de xogadores e xogadoras por parte da área deportiva FEGABA, que continuará a súa labor de detección de talento e planificación das futuras convocatorias.
O evento conta coa colaboración do Concello de Vilagarcía de Arousa e da Fundación de Deportes de Vilagarcía, cuxo apoio resulta esencial para facer realidade esta gran festa do minibasket galego.
