A capital galega confírmase como sede oficial do Campionato de España 3×3 de clubs en categoría U17 masculina e feminina, que se disputará do 12 ao 14 de xuño de 2026.

Galicia sitúase de novo como o epicentro do baloncesto 3×3 a nivel nacional coa celebración dunha das citas máis importantes do calendario federativo. O Campionato contará coa participación de 80 equipos —40 masculinos e 40 femininos— e prevese que congregue a máis de 1.000 persoas entre deportistas, equipos técnicos e público. Un evento desta magnitude supón ademais un impacto económico significativo para a cidade e a súa contorna.

Nas próximas semanas iranse comunicando todos os detalles relativos ao campionato: escenarios de xogo, horarios e actividades complementarias que acompañarán á competición durante eses tres días.

A Federación Galega de Baloncesto quere trasladar o seu agradecemento ao Concello de Santiago de Compostela, cuxa colaboración e compromiso foron determinantes para que a cidade poida albergar esta cita nacional.