A Federación Galega de Baloncesto comparte con futuros árbitros as claves da sostibilidade no deporte de base a través do seu proxecto europeo Erasmus+ Sport.

A Federación Galega de Baloncesto presentou o pasado venres 11 de febreiro de 2026 aos alumnos da Escola Galega de Árbitros (ESGAR) o manual elaborado no marco do proxecto REBOUND, unha iniciativa cofinanciada polo programa Erasmus+ Sport da Unión Europea que explora como o deporte pode avanzar cara a un modelo máis sostible e respectuoso co medio ambiente.

Durante a sesión, os participantes puideron coñecer de primeira man as ferramentas e estratexias que o proxecto REBOUND pon á disposición dos clubs e entidades deportivas para reducir a súa pegada ecolóxica. Desde sistemas de reutilización de material ata a xestión de competicións sen papel, a formación demostrou que a sostibilidade no deporte é moito máis que un obxectivo teórico.

Os cinco piares do proxecto REBOUND
A sesión afondou nos cinco eixos sobre os que se articula o proxecto:
— Educación e Sensibilización.
— Prevención de Residuos e Reutilización.
— Actividades Deportivas Sostibles.
— Xestión Sostible do Material Deportivo.
— Transformación Dixital.

A través de exemplos interactivos e solucións reais, os alumnos da ESGAR puideron comprobar como estes cinco piares se traducen en accións concretas aplicables ao día a día das entidades deportivas galegas.

Un proxecto con alcance europeo
O proxecto REBOUND conta coa participación de socios europeos de referencia: ASD Borgomanero (Italia), Evnikos G.A.S. (Grecia) e Tero PC (Grecia). Cada un deles está a desenvolver actividades formativas similares nos seus respectivos países, co obxectivo común de converter o baloncesto de base nun motor de responsabilidade ambiental e compromiso comunitario.

A FEGABA continuará desenvolvendo novos seminarios e actividades no marco deste proxecto nas próximas semanas. Toda a información estará dispoñible nos canles oficiais da federación.