Os participantes na Xuntanza Minibasket que se celebrará en Ferrol o vindeiro sábado 1 de novembro terán a oportunidade de rematar unha xornada de baloncesto redonda grazas á invitación de BAXI Ferrol.

O club ferrolán convida a todos os xogadores e xogadoras que participen na Xuntanza a asistir ao encontro de Liga Feminina Endesa que o equipo disputará esa mesma tarde (20:30 h)  no Pavillón da Malata ante CAB Estepona.

Entradas gratuítas para os participantes

A través desta iniciativa, BAXI Ferrol ofrece entrada de balde a todos os nenos e nenas que tomen parte na Xuntanza, sempre que se solicite previamente a través dun formulario habilitado para tal fin.

Ademais, os familiares acompañantes poderán acceder ao recinto cunha entrada a prezo reducido de 8 euros.

Unha xornada completa de baloncesto

Esta proposta permite aos máis pequenos vivir unha experiencia completa: xogar pola mañá na Xuntanza e desfrutar pola tarde dun partido oficial de baloncesto profesional. Unha combinación perfecta para inspirar e motivar aos futuros talentos do baloncesto galego.

Prazo de solicitude

As familias interesadas en aproveitar esta oportunidade deben cumprimentar o FORMULARIO DE SOLICITUDE antes do venres, 31 de outubro ás 12:00 horas.

Desde a Federación Galega de Baloncesto agradecemos a BAXI Ferrol esta iniciativa, que contribúe a estreitar os lazos entre o baloncesto de formación e o baloncesto profesional, ofrecendo aos nosos xogadores e xogadoras máis novos unha oportunidade única de vivir o baloncesto desde dentro.