O Presidente da Federación Galega de Baloncesto, Francisco Martín; e o Director Médico de"Clínicas Gaias", Antonio García Pravos; rubricaron un acordo de colaboración este martes, 24 de setembro.
A Federación Galega de Baloncesto suma un novo colaborador ao seu traballo e labor de apoio ao Baloncesto da Comunidade. A entidade Federativa e "Clínicas Gaias" unen esforzos nesta temporada 2013 - 2014, coa responsabilidade social corporativa como nexo común e co obxectivo de acometer diferentes accións que contribúan a mellora das posibilidades deportivas dos federados.
Clínicas Gaias: asistencia de calidade
Clínicas Gaias é un conxunto de policlínicos médicos situados en Santiago, A Coruña, Ferrol, Ribeira e Vigo que nacen cun primeiro centro en 1999 en Santiago formado por tres servizos, Neurocirurxía, Fisioterapia e Traumatoloxía, con especialización en Patoloxía de columna.
Na actualidade dispón de cinco centros, cunha importante cantidade de especialidades médicas e cirúrxicas (traumatoloxía, neurocirurxía, especialistas en tratamento da dor, dano cerebral, neurofisioloxía aínda que tamén outras como cardioloxía, xinecoloxía, otorrino, logopedia, alerxia, dermatoloxía e medicina xeral, así como servizos de fisioterapia e centros de diagnóstico (Resonancias Magnéticas, TAC).
O seu obxectivo é ofrecer unha asistencia de máximo nivel, cos recursos humanos máis capacitados e os recursos tecnolóxicos máis avanzados.
A competición sénior masculina, compromiso inicial
Baixo esta premisa de seriedade e calidade, a primeira das accións visibles xestionadas man a man entre FGB e "Clínicas Gaias" é o patrocinio, por parte desta última, da Liga FGB de Primeira División Masculina, competición que recibe xa a denominación "Clínicas Gaias Primeira División Masculina" e que dará comezo o vindeiro 20 de outubro.
