FEGABA E ANEDIA activan a campaña “Sensores nas pistas”, incluída no programa federativo “SOCIAL BASKET”.
10.000 adhesivos a modo de “sensores” poderanse ver durante toda a fin de semana portadas por xogadores e xogadoras de Baloncesto, así como os adestradores, árbitros e oficiais de mesa
A acción conta co apoio de equipos galegos de categorías nacionais, tanto ACB como da propia Federación Española de Baloncesto.
A Federación Galega de Baloncesto, a través do seu proxecto “SOCIAL BASKET”, e en colaboración con ANEDIA, Asociación de Nenos e Nenas e Xente Nova con Diabetes; activa a campaña “Sensores nas pistas“.
No marco da celebración este xoves, 14 de novembro; do Día Mundial da Diabetes ambas as entidades unen forzas para sensibilizar e dar a coñecer o que significa a diabetes tipo1 e como se pode axudar ás persoas e, en especial aos deportistas, que a sufren no día a día.
A iniciativa repartirá entre todos os federados do Baloncesto Autonómico un total de 10.000 adhesivos que simulan un sensor como o que empregan as persoas que conviven con esta enfermidade. Xogadores, adestradores e equipos arbitrais portarán as mesmas no marco do partidos oficiais a celebrar este sábado e domingo, 16 e 17 de novembro.
Os equipos galegos de categoría ACB, así como diferentes clubs de categorías nacionais sumaranse tamén a esta acción simbólica.
Anedia
ANEDIA, Asociación de Nenos e Nenas con diabetes de Galicia nace en 2013 co obxectivo principal de reivindicar a asistencia sanitaria, especializada e multidisciplinar para todos os afectados pola diabetes tipo1.
Presente na maioría de áreas sanitarias de toda Galicia, defende os dereitos das persoas con diabetes co fin de conseguir a súa plena integración escolar, laboral e social.
